立法會粗口風潮

好老實講,這陣子的立法會粗口爭論,只是代表香港政治進入一個硬膠紀元,人人鬥膠,好似爭做每月之星係有獎咁。

對於社民連三子,小弟可以講,佢地係唔識抽水,當曾蔭權都在立法會講過粗口時,要一招KO屎務政司長唐膠年好簡單,只要曾蔭權同立法會秘書處,承認在特首答問大會講過9up係粗口,侮辱湯家驊同立法會,咁可以立即鳴金收兵,只要曾蔭權唔認,佢地就繼續講同唐膠年以及曾蔭權一樣嘅粗口,咁你玩粗口兵法才有戰略同戰術合理性,我承認他們運用粗口係有戰略合理性,但戰術鋪排就同屎一樣。都係社民連一貫的問題,佢地比泛民有guts去玩膠,條橋好正,但個劇本同演技就爛晒。

而粗口兵法亦唔可以長期用,因為粗口在議會論戰係好低層次的打法,遇上面皮比高登走數王巴貝利仲要厚一倍的林瑞麟,你係無佢符,邊有人學佢咁厚面皮,你話佢人肉錄音機,佢認自己人肉MP3,你話佢係公公,佢話鄭和都係公公,咁你完全吹佢唔漲的喎。唔該搵幾位高登常客,研究一下點對付呢挺福佳而有娛樂性好過。

唐膠年查實係最無資格投訴果個人,因為第一個將性器官相關用字帶入立法會就係佢,佢果次條條fing事件係無心之失,唔好講笑喇。而曾蔭權爆埋粗後,佢更加無資格去投訴社民連三子,而且公眾見到呢條友除咗投訴社民連三子,其他佢應該要去投訴嘅事全部脫逃潛水,呢啲係乜屎務政司長嚟架。

況且近排中國本土,正係因一隻草泥馬封Youtube,搞到全中國人都變成高登用戶,對政府的Admin Bam行徑好鬼憤怒,乜你自己認為做粗口filter好過癮?如果佢自己同曾蔭權肯道歉,肯自膠仲算,要人唔講粗口,但自己講咗又唔找數,自准特首爆粗,不許議員福佳嘅行為,只會令香港市民對政府更加反感。而且唐膠年不斷投訴,只係表示佢段數仲低過任X唔嬲嘅林公公。

香港政治真係,癡癡呆呆,膠埋一檯。

Update

曾 蔭 權 : 講 粗 口 不 是 他 的 習 慣
2009-03-27 HKT 16:12
行 政 長 官 曾 蔭 權 表 示 , 為 政 數 十 年 , 撫 心 自 問 , 自 己 有 很 多 缺 點 , 尤 其 在 辯 論 時 緊 張 , 說 話 就 會 失 音 以 及 失 準 , 但 他 沒 有 講 粗 口 的 習 慣 , 他 也 沒 有 在 議 會 講 粗 口 。

曾特首繼續走數,而且擺明賴數,失音同失準,就可以講粗口,咁都得。梁議員,你可以鋪鋪開會失音同失準,繼續講你的粗口。特首御准講粗口,你點可以唔講。XD

3 thoughts on “立法會粗口風潮

  1. 民主可以拖,粗口立即要處理,原來粗口緊要過民主。咩野叫本末倒置就係呢種。

    特首擺明係送個人情畀社民連。

    「我地辯論時緊張,說話就會失音以及失準,主席喝住我地果陣,就更緊張、更加失準。」

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.