捍衛新聞自由要由產業模式著手

繆美詩:非一日之寒

香港傳媒有幾膠,相信有十幾年傳媒資歷嘅友仔都見得多。小弟十六年傳媒人生涯中,遇上兩鑊政變,一鑊南早林和立事件,一鑊商台封咪事件,你話發生緊乜事。

點解香港傳媒老闆可以咁無顧忌咁干預新聞編採自主,因為香港傳媒就係唔夠市場主導,啲人指責肥佬黎搞市場主導搞衰晒,錯喇,呢個倒果為因,如果夠市場主導,係講嘢勇好多。依家問題係,香港有班傳媒老闆,根本唔在乎銷量,或者有無人睇,只係用嚟幫佢擦共產黨嘅鞋。

好似星島咁,點解會出《頭條日報》,因為《星島日報》唔會有人真金白銀咁買,而免費報紙,派一百萬份無問題,有無人睇根本無人在乎,總之佢同北京以至部分商家話我有一百萬份嘅實力,你真係吹佢唔脹。香港有堆唔在乎錢嘅老闆,為撈政治油水搞傳媒,至搞到依家香港傳播界乜膠都有。亞視長期蝕入肉都有中資老闆入股,大家諗吓乜原因?

所以捍衛新聞自由,係要回歸產業模式,真係支持有心嘅傳媒,真金白銀咁支持係最實惠。所以九月十二日,有班差佬話要罷買報紙咁寸,我就話要買多幾份報紙,我指有心做嘅報紙回應,香港啲差佬算得啲乜,老共算得啲乜,有銷量有錢賺,至可能有人敢言落去,同埋提高記者以及作家待遇,令佢地繼續留喺傳播界。

正如你見到好嘅博客或網站(唔只呢度),例如am730咁,請你9月12日襟一襟網上版廣告,你一蚊都唔駛,都可以表示對好報紙嘅支持。



2 thoughts on “捍衛新聞自由要由產業模式著手

  1. 「好似星島咁,點解會出《頭條日報》,因為《星島日報》唔會有人真金白銀咁買,而免費報紙,派一百萬份無問題,有無人睇根本無人在乎,總之佢同北京以至部分商家話我有一百萬份嘅實力,你真係吹佢唔脹。」

    依我理解,星島靠報紙廣告賺唔少錢。於星島2010年年報可見廣告收入佔集團50%以上,毛利有成10%,世澤兄可留意一下。

    當然亞視咁樣大家都有眼睇唔使多講。

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.