我們這代人,都是喺Steve Jobs巨影下長大

我好少寫IT blog文,因為寫IT blog文對我好費勁。但Steve Jobs死,另作別論。

我雖然又用Mac、又用iPhone、又用iPad,但我唔係果啲趕潮流嘅Mac友,我諗我用Mac好多年,準確啲講,我第一部電腦話雖係一部二手AMD 80286 CPU嘅PC,但實際,真係學用電腦係由Apple IIe開始。

1. 喺港府唔肯投放資源喺電腦教育嘅九十年代初,初中我讀果間金文泰中學,仲係成間電腦都係Apple IIe。當然係落後到離譜,但呢種落後日後睇番不無好處,因為Apple IIe襟用,而且查實無MS-DOS有一堆多如牛毛嘅系統問題要你顧(當時好多人用Seagate HD,但死雞真係死雞,被bad sector玩到陀陀令嘅事都成日發生),大家學習用BASIC,BASIC係十分好去學習最基礎嘅Procedural Programming。當然,一定唔適合依家Object Oriented Programming,果個係要另一套mindset。

2. 到咗中五,兼職排版,排版實離唔開Mac,因為當時用Windows排版,出菲林果陣對住Adobe Type Manager同Postscript管理軟件,完全想爆粗。當然無Steve Jobs年代嘅Mac,果陣係System 7,一樣問題多到離譜,最常見係食炸彈,因為當時Mac機程式出問題要中止,會出兩個卡通炸彈。但總體嚟講,Mac管理檔案起嚟,己經遠比PC有條理n倍。抄到GUI,唔代表抄到裡面嘅好嘢。

3. 真係我徹底投向Mac,係2003年封咪事件前,當時來自各方,包括商台入面內鬼,以至中共嘅資料盜賊多如牛毛,為防被偷資料就決定投向OS X。由OS X開始,我好少要為hang機要浪費人生的光陰,你會感到,Steve Jobs係竭盡全力,為用戶真係用得滿意嘅電腦而努力。

Steve Jobs作為領導電腦由高級設備帶入民眾生活中嘅英雄當之無愧,當然佢人生遺憾缺憾都唔少。我相信今次出唔到iPhone 5,真正原因係無Steve Jobs喺度,無人敢最後拍板。Steve Jobs嘅夢想有可能未必能夠百分百實現,因為有啲事情,要佢喺度至掂。但無論如何,喺七十年代果堆黑客英雄中,佢嘅成就好難比擬,我諗下一個可以同佢匹敵嘅係Bill Gates,但Bill Gates真正對人類有所貢獻,好可能唔喺IT上面,而係佢個慈善基金。

點都好,我地喺佢巨影下長大。而我相信,中國一百年都唔會出到一個Steve Jobs。



4 thoughts on “我們這代人,都是喺Steve Jobs巨影下長大

  1. 個人還是相信唉瘋5是真的已經存在,只可惜日本大地震震散了蘋果的原本計劃。唉瘋4s似是它的plan B. 小弟有這樣想法主要基於以下現象:

    1)新唉瘋一向都在WWDC發布,但今次例外。
    2)唉瘋5真的在form factor有改變的話,它的新touch screen應該很難找到日本以外,還需要可滿足大量生產的供應商。

  2. 再準確啲講,東京電力同東北電力限電,令iPhone 5要嘅零件,個廠響度都供應唔夠。

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.