民主社會決定個人命運

好多人都談論那些年我們一起追的女孩,可能因個人原因,我唔係太對呢套戲覺得感動(唔好問我點解),但九把刀做咗一件好重要嘅事,就係將網絡文學,甚至整個1975-1981呢個世代嘅人都帶出嚟。飾演沈佳儀好友果位,喺網界都係紅人,她就係彎彎,畫麻糬人果位。

九把刀同小弟年紀係差幾個月,但係同樣喺1975-1981呢個年齡領域嘅人,九把刀紅係網絡小說,唔係政治評論文章。但我呢個世代,由小弟,到林忌,到鄧小樺(中大學生報中藥果屆莊),全部難以避免係走上文化或政治評論呢條路。反之,流行小說呢個領域,我呢個世代空晒。一係就走咗去甜故呢個領域,呢個己經係因為高登嘅緣啟。

點解九把刀係寫小說,香港個個都避唔到變咗政治評論,因為台灣完成咗民主化,正如韓國完成咗民主化後,好多擲汽油彈嘅大學生成為大企業要員,或者成為電視電影創作人,造就韓劇韓片嘅新世代。香港偏偏正值亂世,而評論人吃香嘅時間,往往係天下大亂果陣,你估鬧人唔駛死細胞架。你連畫好cute嘅丁丁嘅江康泉,好多時都會談論政治,你就知香港政局混亂對我地呢個世代嘅嚴重影響。

一個無香港統監府呢類怪物嘅社會,網絡作家寫得好,就好容易打入主流,有人出九把刀嘅書,投資拍電影,甚至黎智英同佢賭一版全版廣告,彎彎嘅公仔,好早就被睇中用嚟幫商品代言。用網絡流行嘅漫畫人物嚟代言,係電訊盈科、牛奶國際做得最進取,其他港資公司,完全無諗過用本土漫畫人物嚟代言。

只有一個正常民主社會,至可能令有意創作嘅人,有選擇商業或政治創作權利。生逢亂世,鬧人為業真係無符,因為個社會運作唔正常,點搞。



4 thoughts on “民主社會決定個人命運

  1. 本人在英也投入寫英文小說的的行列(因為沒有工作發呆)。同意第二及三段你所說。我們這一代港人差不多沒有經過重大事件洗禮(除了六四)。電視劇都沒有甚麼可以反映香港重大的政治劇,被活色生香洗腦得很緊要。

    本人也去過一個小眾的writing group,但是我對他們的作品也不感興趣。内容又是一些活色生香的情節。我認為我們週遭的事件也會塑造我們的人生和命運。我知道是寫小說,但我和他們風格也很不同(我開始時寫結尾,但已經概括介紹英國發生甚麼事,我已經包含了歐債危機,佔領華爾街活動,其至中國的部分歷史等等)。

    本人尚在學習中…

  2. 建議中共特區政府幫一些運動員做政府工, 準時返工放工可括出時間training, 出外較易話為……………..

  3. 當前亂世, 甦醒咗嘅人意識社會七國咁亂, 自不然都會談論時事, 就算不公開地參與時評、政治分析, 都會一班朋友圍埋時對時局討論一番。當然的, 有更多人沒去理會社會上到底發生緊乜嘢事, 只顧吃喝玩樂, 或是為了討飯而終日勞碌。

    誠然如此, 除了時評, 還有何文化創作的可能?!

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.