中國膠到走去禁《天與地》

本來《天與地》由於套劇本身有唔少製作疏漏,同名留青史有啲距離。但中國國家廣電總局竟然膠到去禁《天與地》,呢個殊榮仲勁過乜嘢視后視帝,《天與地》亦註定名留青史。

但我相信,製作《天與地》呢類劇集至係香港嘅核心競爭力。

中國劇集由於受太多官方制肘,唔係情節仲離譜十萬八千倍嘅「穿越劇」,就係同中共意識形態塗脂抹粉嘅清裝片,講國共內戰,或中共軍隊史嘅片,又出唔到口,你唔明中共歷史基本上唔識睇。而香港由於仲有創作自由,至可以製作《天與地》呢類探討人性、良知同歷史嘅劇。一如依家講文革史最堅嘅電視劇,係英治年代亞視製作,韋家輝嘅《還看今朝》。

我相信之前《天與地》收視數字,隨時係政治陰謀,因為依家收視調查機構正係中國中央電視台有份嘅合資公司。中央電視台可能收到order要整死佢,點知網上討論太熱烈,咪迫到膠到要公然禁播《天與地》。只不過禁咗就係最好宣傳,本來唔知有呢套劇都走去搵嚟睇。

但如果我係無線,我會視係一次搵銀嘅黃金機會,我實即刻叫TVBI壓DVD Boxset同BD Boxset,農曆新年成棚自由行過嚟香港買返去當手信,仲唔搵一大筆?甚至開拍電影版,原裝人馬,都應該票房有番咁上下,一如《阿凡達》嚟港嘅人潮咁。



7 thoughts on “中國膠到走去禁《天與地》

  1. 最重要的係天與地0個個時間23點?TVB有慣性收視(即係開左電視冇人睇),aTV也沒進賬。就算D人出街,都唔係咁。

  2. 就算出DVD Boxset,以無記嘅性格,肯定會靜雞雞cut走一D佢地認為係會令大陸敏感嘅內容,到時候出街嘅模樣已經跟公仔箱版本略有不同。

    不樂觀矣。

  3. 老共官僚跟港式爛肥皂劇師奶傻迷,誰更一級五星「智將」?猜中無獎!

    多得亂禁曲到無倫,至少套劇不會沉默無聲落幕。

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.