香港保衛戰七十周年

12月7日,日軍由單冠灣(今千島群島擇捉島)出發艦隊偷襲珍珠港,12月8日日軍就空襲深水埗軍營和啟德機場。今日是太平洋戰爭七十年,但香港政府一啲表示都無,唔好講傳媒。

香港保衛戰係香港歷史重要一役,軍票問題日本固然未找數(係走緊數),而三年零八個月嘅日子,亦應該為港人世世代代所記。但中國政府立心要刪除歷史記憶,所以隻字不提,極為可恥。

香港有乜人會提呢單嘢,我諗反而係英資公司會緊記呢件事,我坐國泰飛機,今期佢地嘅航機刊物,登咗篇特稿,講陳策將軍,KBE,呢位中華民國國軍獨腳將軍,憑幾隻英軍投降前留低嘅艦艇,一條友帶住幾十位英軍軍人、港府官員同埋中華民國駐港官員,殺出重圍,翻山越嶺抵達仍然喺中華民國軍隊控制下嘅惠州,真係少啲膽量都唔掂,因為當時日軍足夠打到佢地變蜜蜂竇。同埋呢班倖存軍人嘅子孫,重臨故地嘅故事。陳策憑佢勇救英軍嘅功績,獲得英帝國爵級司令勳銜,如果佢有英籍,佢真係叫陳Sir。點解可以荒謬到,得一間航空公司仲會記住呢段歷史。

歷史係一國之本,所以一定要珍重香港重要嘅歷史,特別被侵略嘅歷史。中國點解搞到咁大鑊,因為中國人太善忘,香港人係唔可以學中國人呢挺衰嘢。




13 thoughts on “香港保衛戰七十周年

  1. 因為當時既守軍係英國殖民地既人,中共當然唔會講,何況特府!其實當年有義勇軍係土生港人,應提提他們既事跡吧!

  2. 補充樓上:海防博物館個展覽講陳策將軍o個part係將佢同部下既逃亡故事用專題形式介紹,值得一睇。

  3. 最令我地痛心,亦係最令人感到希望。知識係由文字語言,一代傳一代。洗腦又係透過文宣筆伐。
    中文字不單兩者兼故,無論正體及殘體,重要係最強大的工具,所以”中國人”係最聰明,可以係惡劣環境下開花結果;亦係最墮落,向著錯誤的方向前進。以上中國人係指文化,同種族無關。

  4. 七十年前嘅今日,俾日軍炸咗飛機嘅地方,聽聞就喺我住嘅地方附近…(但有疑點,戰前啟德可能係包括大磡村同牛池灣一帶)另,九龍區好似一直都唔提及同保衛戰有關嘅事,除咗大磡村(十年前)仲有人提,但只因為有個鋅鐵搭成嘅飛機庫喺嗰度。

    off topic: 搬運員喺今年夏季出咗本地區工作報告,其中講到佢倡議喺近消防同樂會附近工地興建空軍博物館,但我擔心最終會被騎劫,變咗嚿唔知咩嘢出嚟。

  5. Exactly what 方潤 said.

    Go visit the massively underrated Museum of Coastal Defense in Shau Kei Wan on the amazing escape from Hong Kong of many British officers led by KMT Admiral Chan Chak. Very interesting exhibition of their stuff that they used in their escape, lent to the museum by their descendents.

  6. 「七十年前嘅今日,俾日軍炸咗飛機嘅地方,聽聞就喺我住嘅地方附近…(但有疑點,戰前啟德可能係包括大磡村同牛池灣一帶)」
    新蒲崗一帶原本是機場範圍,當時彩虹道是清水灣道的一部份。

  7. I guess the invasion of HK acutally took place a few hrs before the attack on Pearl Harbor. That was bcos HK and Hawaii are on different side of the international date line.

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.