認識中國嘅人至會企喺獨派果面

好多大中華主義上腦嘅假左派,認定小弟呢挺港獨派,或陳雲呢挺自治派唔認識中國,或唔救中國。

呢啲讀壞書,燒壞腦嘅大中國主義分子,往往對中國有係幻想,並唔係真係認識中國。我諗有位台獨領袖嘅生平,會令大家明白,越認識當今中國,至會越反中國。呢位係台獨經典著作《台灣人四百年史》嘅作者史明。《台灣人四百年史》係今日了解台獨思想必讀著作,當然十個香港鬧台獨嘅友仔,九個無讀呢本書。

中共一向唔敢公開挑史明機,唔只因為史明真係好熟馬克思主義理論(真係熟馬克思主義會企喺獨派,抗拒中國殖民,所以我話香港好多假左仔),史明令中共最尷尬係,佢係一九三七年入中共控制下嘅日共,一九四二年去延安抗日,佢嘅資歷差唔多係中共元老級。如果話佢無參與救中國工作,唔好意思,江澤民、胡錦濤嘅中共黨齡全部唔係史明果皮。

佢之所以台獨,因為佢見過中共班友做嘢方式,亦睇過國民黨班友嘅做嘢方式,兩邊做嘢都係仆街嚟,同佢呢挺喺日本受教育嘅台灣人諗法唔同。史明可以講係日本精英,佢係早稻田大學政治經濟學系畢業。佢覺得中國人超唔妥,所以就完全對中國人死心,投向台獨運動。

陳雲投入中國民運可能比好多人深同廣,一九九三至九五年,佢係民主中國陣線德國分部主席,佢救過六百幾名當時喺德國嘅中國人。佢無欠中國,但佢同中國人打交道嘅經驗,亦會比好多人都深。所以佢變成自治派,我唔奇怪,史明走過咁嘅路,陳雲都會走咁嘅路,歷史係會重覆。

甚至李登輝提出建構新中原嘅理論,都係呢種海外華人蛻變站喺反中第一線嘅縮影,《武士道解題》係我一直要求任何研究台灣當代政治嘅人一定要睇嘅書,但《武士道解題》對好多人嚟講極難消化,因為大量引用四書五經,古文根柢少啲都係咁先。就算黃文雄寫嘅《哲人政治家,李登輝之「我」》,啲古文都係飛嚟飛去,無睇中國古籍習慣係消化唔嚟。李登輝嘅中華文化修養,比馬英九仲要好,但李登輝保留中國文化精粹,提出建立新中原嚟令台灣尋求自主,大家諗吓點解喇。好多獨派國學修養都唔差,特別日本返嚟果批,但你試吓叫果班國民黨二世祖引經據典,你睇吓邊個得。

香港假膠當道,有啲民族或國家無得救,真係無得救,亦無謂去救。香港做好自已獨立自主,就係對中華文化精要嘅最大救贖。係中國人欠我地(如果佢地仲珍視中華文化嘅話),我地完全無欠中國嘅。

後話:所以台獨無必要去中國化,因為依家呢個中國已經係垃圾,捍衛中華文化就係台獨正義之旗。如果再唔明,睇番德川光圀嘅歷史。《大日本史》係用古文寫,睇以下連結就明:
大日本史:卷之一百六 列傳第三十三



10 thoughts on “認識中國嘅人至會企喺獨派果面

  1. 留意近來政治生態, 包括近期官員, 特首候選人, 與及土共搶走港獨思維應有既政治議題, 文宣/個人抺黑等等, 己經好明顥見到, 泛民己經唔係中共最優先處理對像.

    而家中共及泛民都好著力去消滅自治思維既萌芽, 視之為港獨, 預料攻擊會接緊而來.

    請小心

  2. 香港自治,天經地義。
    哪一位特首可以以起錨的聲勢去修改基本法24條,及取消每日百五名單程証的灌槳政治工程?

  3. 而家泛民淪為建制一員,只是他們沒有得到應有利益而已。睇來我們都係要靠自己。

  4. 我覺得公民黨係目前最可靠既政黨
    佢哋區議會選舉失利係衰在缺乏政治智慧/經驗, 只要佢哋汲收經驗, 打本土主義牌, 香港人一定撐

    民主黨又冇政治智慧, 又冇誠信, 睇怕都玩完

    回淩天羽:
    唔講唔覺, 近排D 土共真係不斷提港獨, 差在未講回歸英國咋
    睇嚟佢哋開始怯

  5. 凌天羽:
    所言甚是。另,而家真係唔少抹黑HKAM嘅言論。
    尤其是發夢熊同氓燴報,根本佢哋喺度誹謗。
    舊年粵語事件後,翻睇國父遺教(該書為建國方畧及建國大綱之合訂本,三民出版)部份內容令我心寒。高鐵及現時中共語言政策,原來孫醫生講過啲類似嘅嘢。即係,現時嘅政策,好程大度上有孫文理論嘅影子…

    版主,如果想睇呢堆的話,對於冇根底嘅人,應該睇邊本先?

  6. 都係個句。只需堅持必須修改基本法24條及收回單雙程証審批權,土共港共即刻現形。

    公民袋衰在個個係外面讀書,吸收埋哂d英美學界左毒番嚟。佢地係唔識處理本土議題架嘞。

  7. TTTK:
    呢個主張,喺區選前,我認同。
    但區選失利後,梁家傑一連幾日嘅言論,令我覺得佢地唔係我一直認為咁可信。
    而家最可信嘅,恐怕係陶派社記同長毛。

    但幾時先有一個完全採用HKAM主張嘅政黨出現?

  8. 最近睇一篇報道講今夏倫敦奧運,倫敦特別成立了一個專責小組,鋻察及防止某些項目打假,列舉高危球類項目如足球,甚至網球等等。還列舉了上屆京奧一場入場券手球賽事,南韓對卡塔爾,好似係卡塔爾,呢埸賽事用廣東話講就是離撚晒譜,首先南韓手球技術在十幾廿年早已經脫亞入歐,在亞洲早已無對手,但由於黑雞問題,搞到最後南韓輸十幾卄粒波,換個角度看就如籃球我射三分,球球入但球證話我剛剛站在三分線內,結果南韓球員球球在三分線外多一米外手,吹咩,然後球證老屈走歩,好彩大會最後判重賽,南韓肯對手唔肯,最後南韓始終成功出線。亦由於南韓有球員在歐洲打職業賽,有球員上德國電視台接受訪問講述事件。如果用來借鏡,你話似香港那些事件呢?抽水完畢。

  9. 事實上, 我瀨過野.
    1. 所謂搶議題, 將議題搶到自己手中, 然後加以宣傳, 若果真係得既話就成功爭取, 將一d 人地一直爭取到既野爭到自己手中, 將有利於民望既議題搶到手裏, 但記住, 佢地轉軚速度非一般人想像, 咪以為佢地真係反雙非咁on9. 騙人的!

    2. 瘋狂抺黑, 特別係內部破壞, 好似d&g 單野, 昨天就有一個店員被起底, ok, fine, 佢講錯野剷佢無問題, 但道歉之後仍然有人唔滿意, 而果d 唔滿意一定要整死佢果堆, 查番佢地留言record, 竟然一直對d&g 無意見既人. 即係有人根本就係想陷成個高登於不義.

    另一方面, 星期日應該去支持一下班大肚婆,

    1. 以表示呢個議題仲係響人民手中, 叫班政黨佢地收皮, 亦唔好唸住用呢一單野抽水, 偽政客, 假好心.

    2. 因為之前佢地admin 失言, 以致出現好多陰謀論等等, 參與呢一次活動, 藉此觀察一下呢一個群組, 去了解有無支持錯人.

    3. 反蝗…… 係一種生活態度.

    James : 社記裏面一樣好複雜的, 但我可以講, 最可以信的肯定係長毛, 同埋阿牛….

  10. 不如組織一個政黨,主要負責監督政府落實承諾和施政進度,尤其是一國二制,港人治港。
    看看英國歷史,會發覺英國議會設立目的,就是監督皇帝履行大憲章這份公約。
    中國人文化基因不缺武勇,缺的是監督,尤其是對政府和權力的監督。歷朝歷代不乏殺皇帝的革命家,缺的卻是如英國一樣,與國王訂合約並要求遵守的大政治家。看看英國貴族怎樣對待皇帝?中國人怎樣對待皇帝,很多人便會明白解決中國政治死結的契機是什麼了。

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.