梁振英已經玩完

特區政府新聞公報:政府回應有關西九龍填海區概念規劃比賽查詢

梁先生於二○○二年二月二十五日申報,據他所知,在他的直系親屬或僱員、與其有僱傭合約或在有關專業上與其有密切連繫或夥伴關係的人士中,並無任何人士參加了是項比賽,而他亦非任何公司的董事或主要股東。

  隨後兩天(二月二十六日及二十七日),評審團進行了評審工作,並就參賽作品投票選出冠軍、亞軍和三個優異獎。梁先生有份參與評審(包括投票)過程。

  在投票程序完成後,比賽小組發現入圍名單中其中一個參賽隊伍的成員疑與梁先生有關連。

  翌日(二月二十八日)在公布比賽結果前,比賽小組知會了梁先生上述發現。梁先生於當天早上向評審團報告有關事宜,評審團亦決定按照比賽守則,取消所涉及的參賽隊伍資格。比賽結果於同日下午公布。

政府好少咁發新聞稿,但隨住薄熙來嘅失勢,風格類似嘅梁振英,亦被曾蔭權親自出手處理。咁嘅新聞公報下,除非土共有人想賭薄熙來鹹魚翻生,否則我相信無乜人咁夠薑,走去提名梁振英,換言之梁振英唔會夠票入閘。就算勉強被佢搏入閘,支持佢啲友仔,處境隨時比泛民更牙煙。

呢啲就係中共式,刀刀見骨嘅政治遊戲。而且呢鋪唔係結束,只係開始。由於唐英年條友起個勢太弱,所以梁振英同埋董建華相連啲友仔,會逐個攞出嚟清算責任,好戲連場。呢種清場,係要為唐英年上台政治穩定性殺出血路,所以種票案發展亦會好好睇。

當然梁振英會唔會出啲爛渣招玩嘢,好睇薄熙來嚟重慶,究竟想點,薄熙來如果玩啲膠嘢,梁振英有樣學樣一啲唔奇。所以大家要考慮仲有一個可能性,北京俾泛民何俊仁入閘其中一個原因,如果中共權鬥兩敗俱傷,屍橫遍野嘅話,明知何俊仁係支聯會常委都可能要接受,因為佢係睇落中立。

分析香港特首選舉好似分析黑幫開片咁,認真悲哀。



6 thoughts on “梁振英已經玩完

  1. 無論誰人當選,港人聰明點就應該發動輿論救該人,畢竟,有人肯參選,不論最後誰人當選,都是香港之幸,最少還有人想為香港做事。不要學中史的黨爭,要學英美兩國的政黨論替才是正路。

  2. 首先, 薄熙來係江派的, 薄熙來出事會扯埋江澤民落水. 梁振英嘛…… 後面唔知邊個橕….

    去到呢個情勢(唸唔到一兩日內轉變咁大), 隻狼比人劏係好事, 佢入場若果加埋後面有汪洋橕佢玩粵港既話, 香港真係溶左都似.

    但若果梁振英入唔到場, 唐英年又會坐大, 日後無左足以制衡唐營既政敵, 又唔係一件好事. 咁樣香港既民意又會好易比唐英年所代表既50 後壓實, 難以出頭.

    最理想係香港並唔需要中共欽點一個強勢有民望既特首, 最好係一個最弱勢, 每件事都要看民意至做得, 隨時施政錯誤都會引出幾萬人出來既特首, 咁民意先至可以響呢d 場合顯出其價值. 本土亦先至響呢種土壞得到最好發展.

    強梁比弱唐上 or 強唐比弱梁上, 都好過比一個強民意既人上.

  3. 至於何俊仁, 世澤都見到民主黨近日佢打撃本土運動果種嚴厲法, 加上民主黨對社運果種看法就明白, 比民主黨上位, 有利既不會係年青人, 亦加唔可能會幫到年青人.

    人民力量/社運班人點比民主黨臭罵有樣你睇. 讓民主老人家政黨做特首, 不單會令香港政治加速老化, 更會令到上一輩果一種價值觀響香港更加強化, 造成更大更深遠的的世代性不公平.

    三件都係爛橙, 結論只係要揀邊一件唔會咁臭而己.

  4. MO係熱門馬評。不過振英之光本來就係大冷門。(爛頭何那些算陪跑咩?賠率都唔使出)
    除非佢明天被人’打跛’左,否則大冷門仍然係特大冷門。
    如果要爬冷。頭馬皇立軍今次打柴. 熙住來個馬房今次唔止可能會取消資格. 隨時被人好似上次晨曦同或神良宇咁拉去封鋪長期治療.
    上次汪洋係烏坎角都無被人拉下馬. 補救得來仲升班有望.
    熙住來無理由無返兩手倉底鞭法. 最緊要係, 注雖然未下, 但入面太多人唔想無盤賭. 一來賭性太強, 二來無輸贏. 無額外機會收人地既水去還返自己條街數. 大家都唔掂.
    所以盤照開. 最多之後大盤走數, 細盤照賠. 振英之光隨時會被當細盤派片架.. (瘋狂馬迷考)

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.