評說戴卓爾夫人功過

此為本人喺D100世界視野通識廣播嘅原講稿

英國前首相戴卓爾夫人喺4月8日逝世,享年87歲。呢位英國歷史上其中一位最具爭議性嘅首相,終於離開人世。
呢位首相令人又愛又恨,暫且撇除佢對香港問題嘅功過唔論,戴卓爾夫人對英國有佢嘅決定性貢獻,但有啲今日英國嘅問題,亦都係由佢搞出嚟。
戴卓爾夫人在任有三大貢獻,除咗奠定咗英國女性參政地位外,她大幅修正英國嘅福利主義政策,挽救英國嘅國家財政,確立咗英國政壇過去咁多年嘅中間偏右路線。無論新工黨嘅貝理雅,定依家保守黨首相卡梅倫,都離唔開戴卓爾夫人嘅路線。而她同列根聯手對抗蘇聯,亦係成功咗結束冷戰嘅一大功臣。
只不過,她當年放棄國有化政策,將好多國有企業重新私有化,對英國亦有唔少負面影響,依家英國好多大工業集團,以至技術都落咗喺美國、法國嘅企業,導致英國工業嘅空洞化,英國過度依賴金融業,喺金融海嘯之後,英國無法好似法國、德國咁抵擋金融海嘯後嘅經濟蕭條,呢個正係戴卓爾夫人種下嘅禍根。
除此以外,戴卓爾夫人將大量蘇格蘭同英格蘭北部嘅國有企業關閉,除咗令好多工人失業外,最大問題係對當地經濟造成好大打擊。喺戴卓爾夫人上台之後,保守黨喺蘇格蘭影響力大減,甚至好多蘇格蘭人視保守黨為仇敵,造就咗左翼嘅獨立政黨蘇格蘭國民黨崛起,種下蘇格蘭獨立嘅禍根。如果聯合王國喺2014年嘅公投後解體嘅話,當中責任一定追溯到戴卓爾夫上身上。
相信戴卓爾夫人嘅功過,會係歷史學家極有興趣一個課題,因為今日英國政壇面貌,唔少問題都同戴卓爾夫人有關。而好多戴卓爾夫人當政期間嘅文件會陸續喺呢幾年解密,相信會可以令我們睇得更清楚戴卓爾嘅功過。


9 thoughts on “評說戴卓爾夫人功過

  1. 就算私有化政策有負面影響,亦唔可能假設冇私有化一切就更美好。當年私有化政策,係針對死氣沉沉嘅經濟,如果唔私有化,可能到八十年代尾蘇格蘭同英格蘭北部嘅國有企業大部份已經倒閉,或者會賣晒俾日本企業,UK亦可能頂唔住爆煲而解體。蘇格蘭太倚賴工業,全球化之下橫又死掂又死,私有化其實有可能將死期押後二三十年都唔定。

    要追溯責任,其實當初工黨喺戰後嘅國有化政策,對今日嘅經濟困局又要負幾多責任?美國戰後靠私人企業令經濟起飛,如果英國當年唔係工黨上台,如果邱吉爾繼續執政,又或者如果左翼思想、福利主義唔喺戰後喺歐洲抬頭,歷史又會係點?

  2. 其實,戴卓爾夫人之所以在人民大會堂PK,某程度上,是因為大陸梯級之設計不合人的正常步履,不應該高的高,不應闊的闊,有很多大陸的景點,行其台階須格外留神。

  3. 其實,戴卓爾夫人之所以在人民大會堂PK,某程度上,是因為大陸梯級之設計不合人的正常步履,不應該高的高,不應闊的闊,有很多大陸的景點,行其台階須格外留神。

    X2

  4. 種下蘇格蘭獨立嘅禍根

    我唔覺得係禍
    一個地方應由公民自決
    改左中國人D大一統思想吧..

  5. 戴卓爾夫人當年壓制工會,國企私有化,其實最基本目的就係要阻止”貪得無厭”;工會權力過大,工人會”貪得無厭”。
    同樣,老闆權力過大,老闆就會”貪得無厭”,不停咁壓榨工人;香港的李老闆就係權力太大,所以”貪得無厭”,不停壓榨貨櫃碼頭工人。

  6. 「HK人用開攪字 搞係大陸字」

    關咩事,我由細到大都係用搞。攪係有攪拌、攪勻、攪動的意思,搞是做的意思,兩個意思唔該分清。

  7. 鐘擺原則:工人同老闆基本都係貪得無厭, 當工會太強, 工人就會變懶, 老闆太強就會壓榨工人, 點樣平衝兩邊利益先係重要,戴卓爾夫人只係順勢而行, 唔駛將私有化入哂佢數, 就算第二個上台都會咁做, 反而以前港督係香港就係平衡方面做得好少少, 可能地方細關係, 不過平衝本身已經係高難度, 有咩國家可以做得好好?

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.