用八達通嚟買車飛?係智障設計?

mfile_55_1064626_1

港島線西延嘅三個站嘅售票機,出現咗八達通買單程飛嘅功能,之後就被人話係太陽能電筒。

對於小弟呢啲經常出入日本嘅人,並唔對呢類功能感到意外,如果照JR東日本同JR西日本嘅營運標準,八達通買單程飛功能並唔係太陽能電筒,相反係保障乘客利益措施。

日本嘅銷售稅係無孔不入,連搭程JR都要交銷售稅,而自加銷售稅後,由於單程車飛價格以十円四捨五入嚟計,所以大部分時間ICOCA或Suica嘅車費平過傳統車飛都好,但仍然有車程出現ICOCA或Suica貴過傳統車飛嘅漏洞。所以日本JR,至少以我親身經歷,JR東日本同西日本所有售票機都有用IC車票買傳統車票嘅功能。只要港鐵一日仍有機會出現單程飛貴過八達通嘅情況,售票機設計都要考慮呢種情況。

相反,如果港鐵要做好統一八達通增值機同單程票售票機嘅工作,最好有樣嘢向JR東日本學習:接受硬幣增值同調低增值最低金額。

同樣喺銷售稅稅率上升後,日本人本來已經神沙滿天飛,情況更嚴重,JR東日本為鼓勵大家多幫襯Suica,將增值最低金額調低至500円,同埋可以將啲100円、50円隊晒落去增值,總之凑夠500円就無問題。

香港駛鬼金管局搞乜嘢收銀車,港鐵將八達通最低增值金額調低至20蚊,甚至10蚊,甚至不設限(只限透過新售票機),大把人將啲神沙隊入八達通。喺呢方面,港鐵就係諗得未夠日本人咁細心。

3 thoughts on “用八達通嚟買車飛?係智障設計?

  1. 其實個設計係為左俾你 (有八達通) 買飛比需要買單程票而又冇散銀既同行友人/唔想入紙幣嘔返一堆散銀比你

  2. 樓主個論點有點問題,始終有人用八達通買單程票都好,我都唔信港鐵係個張單程票會收八達通票價。同你日本的例子剛好相反。

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.