開放付款平台方為王道

tube_train-1200-80

糾正咗唔少人對港島線西延各站新售票機嘅偏見,港鐵嘅售票機有進步,係唔係代表可以縱容八達通霸權?肯定唔係。

早期八達通係一個封閉平台可以理解,因為當然NFC未有一個統一業界標準,香港幾乎係第一個廣泛利用Sony Felica技術嘅公司。但依家港鐵仲齋收八達通,就一定講唔過去,依家港鐵嘅單程飛,既有Sony Felica Lite,亦有NXP Semiconductor嘅MiFare Ultralight嘅技術喺度,根本係標準NFC嘅技術四圍飛,只要軟件同結算上做好,係可以接受多唔同品種嘅飛。

最合理嘅做法係好似倫敦地鐵咁,既接受Oyster咭,亦接受支援VISA Paywave、Mastercard Paypass,甚至銀聯閃付嘅咭。而支援上述三大種咭,唔單只少咗好多增值問題(當然香港嘅銀行亦應推出Paywave嘅Debit Card配合),亦開放市場競爭,亦便利遊客。當然,如果VISA、Mastercard堅持收貴手續費,透過VISA、Mastercard俾嘅車費略高於八達通,都合情合理。

甚至可以玩得再盡啲,可以做到台北悠遊咭,日本交通系IC卡以及嶺南通互通都得,只要外幣結算平台搞得掂。

總言之,開放付款平台,方為王道,依家八達通恃住大股東係港鐵,喺港鐵橫行嘅做法,喺外國一早視為反競爭行為。港府帶頭搞反競爭,有無搞錯。

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.