導火新聞線:港視做對了

Screen Shot 2015-03-15 at 5.47.43 pm

如果HKTV攞導火新聞線做開台劇,唔係警界線或選戰,或者會好好多。《導火新聞線》可以講係暫時嚟講,hKTV第一套合符英美劇集水平嘅劇。

《選戰》個題材係爆,問題係佢挑戰緊歐陸拍得好,英美一直拍得唔多好嘅政治劇。《選戰》帶有好重《House of Cards》影子,問題係《House of Cards》作者Michael Dobbs係前保守黨幕僚長(Chief of Staff of Conservative Party),亦做過馬卓安執政期間嘅保守黨副主席,係名副其實政治陰謀執行專家,同肥彭係同代同級人馬。《選戰》無一個實際操作過政治嘅人做劇本顧問,結果張癸龍或宋漫山好多招數比泛民或土共班膠人仲高明,但好多位亦唔知點寫落去,被人媽爆係正常。《選戰》只係證明,港視嘅演員好掂,但要寫港版《House of Cards》,唔該搵個顧問睇睇劇本先。

《來生不做香港人》係娛樂性唔錯,細節亦做得好,但鋪排格式始終係TVB Format。《警界線》更加唔駛講,似港產片。

《導火新聞線》眼前一亮,因為內部對報館運作嘅描述,佈置,八成半像真,好似對炒台之類術語嘅掌握,做過記者都知乜事發生。而香港受英國小報傳統影響,香港報館搶新聞之狼,戲劇性比美國HBO《The Newsroom》強好多,所以《導火新聞線》就變得好好睇。當然編劇係新聞人出身,同埋老闆王維基自己參與過報館籌辦(今日香港免費報紙係王維基實驗室嘅結果嚟,我喺iChannel嘅工作之一),亦大大增強《導火新聞線》嘅可觀性。

甚至第四集睇落好誇嘅報館奪權,都唔係天方夜譚。喺壹傳媒,報館奪權唔駛玩到咁複雜,直接報俾肥佬黎就得(喺壹傳媒,有老總咁玩檯底交易,放棄賣到紙新聞,皇阿媽聽炒喇)。第四集嘅奪權方式,其實係《南華早報》或《明報》一類報館可能發生,甚至發生過。當然,可以為正義而兵變,呢個係有骨氣新聞人嘅夢想嚟。

而個format,似番美劇,同《ER》類近,可以用Season開劇,題材亦當然有排做。因為美劇特色,係有個不變嘅theme,人物可以替換(《ER》、《Law and Order》都係咁)。而《導火新聞線》呢方面設定明確,後《壹號皇庭》後罕見。

想了解香港新聞界運作,或探討一啲新聞界嘅問題,《導火新聞線》係我個人高度推介。

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.