法西斯式敬禮咪亂做

PSP0411072011

近排中大有人玩膠做納粹式敬禮,結果被有啲有政治背景嘅網媒攞嚟報導。其實好多人香港人玩膠果陣,都忽略咗,呢個世界有啲嘢,堅係禁忌,納粹法西斯就係其中之一。

以上圖片係澳門警察行嘅「羅馬式敬禮」,澳門警察點解行法西斯式敬禮?因為1974年康乃馨革命前嘅葡萄牙,正處Estado Novo年代,正係一個法西斯政體,同西班牙佛朗哥班長槍黨係同類東東嚟,而葡萄牙由於MFA左翼分子取得政權後,立即表明放棄澳門,無喺澳門搞好清理法西斯嘅工作,搞到澳門有唔少法西斯殘餘物喺度,而喺互聯網年代,澳門警察嘅敬禮方式,就令人好唔舒服。

喺歐洲甚至澳洲,亂咁攞希特拉敬禮嚟玩膠,唔單只係引來關公,而且更加可能招來刑事代價。所以我奉勸各位一句,乜都可以玩,咪攞納粹或法西斯嚟玩。

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.