魚蛋會暴動?無車坐都會暴動喇

snap314_qBSs5vOtIe9r

喺魚蛋都引發暴動嘅年代,其實迫地鐵會唔會迫到暴動。如果大家知道乜嘢叫首都圈國鐵暴動事件嘅話,就會明,堅持起高鐵隨時會引發暴動源頭。

以上NHK新聞片段,大家可以想像到日本國鐵當年有幾擠迫,返工似打仗,裙拉褲甩好正常。而當時日本國鐵亂起新幹線,仲有啲酬庸政客嘅赤字路線,搞到蝕錢蝕到傻,要解決蝕錢問題,不外乎減人工同減班次。減班次大家坐唔到車返工或放工,已經搞到大家好火。

當時日本政府減唔到班次,咁咪減人工,但減人工啲員工就睬你都傻,結果工會就搞「順法鬥爭」,亦即係「按章工作」,班次延誤兼大減,無車坐,大家對JNR積怨奇深,上尾事件爆完都未收到科,結果就搞出首都圈國鐵暴動,成棚西裝友變咗勇武暴民。

如果高鐵繼續,港鐵唔加得價,就只有出古惑招,例如減人工或偷減班次,或用埋啲中國製列車搞到好多延誤問題,日日都火氣上升最終就西裝友都變暴民。大家以為呢啲係天方夜譚?我覺得遲早香港會爆劑勁,爭在爆喺港鐵身上定九巴身上。

發表迴響

你的電子郵件位址並不會被公開。 必要欄位標記為 *

Time limit is exhausted. Please reload CAPTCHA.