大家請由2:40睇起，特別李光耀幾段歷史演辭。

其實新馬分家，已經遠超華人同馬來人嘅裂痕，因為新加坡嘅馬來人都跟李光耀一齊走。由4:29開始演辭，就將問題一針見血講出嚟，你想建立點嘅新國家至得架？

新加坡同馬來西亞因共同對付中共支持嘅馬共，勉強合埋一齊，因為無傾清楚係share the burden and reward，定馬拉佬攞話晒事，華人分餅碎，都搞到一鑊泡，民生、政制、經濟一大堆問題搞唔掂，搞咗廿個月，頂唔順，分開算數，宣布唔玩。

依家英國佬未經公投塞香港俾中國，意識形態分歧本來就好大，香港人用幻想嘅「中國意識」頂住，經過整整十五年，最後一個雙非問題，始終要爆煲。如果二十個月至浮上水嘅問題都搞到新馬咁，一個香港人FF足十五年嘅問題，你認為可以一味叫香港人， 特別受十月懷胎之苦嘅大肚婆去唔鬧爆，簡直係奇想。原來一路幻想落去，就可以令問題消失，我唔識呢挺神乎其技。就算末期癌症病人，打得多芬太尼都失效，更何況用「國族想像」呢樣嘢，點克服十月懷胎前後嘅痛苦呀？

我未生過仔，但我絕對明白啲大肚婆點解咁慶，由大緊肚，到喺醫院，到生咗之後唔係就咁算，又要帶母嬰健康院、打疫苗、撲奶粉、同BB餵奶掃風，換尿片，瞓又瞓唔好，好多左膠無生過仔，無親歷大肚婆嘅痛苦，就一路講風涼話，呢樣嘢亦係我決定開炮開得咁恆嘅原因。乜了解自已人嘅痛苦，咁難咩？

好勝，同堅持統一如李光耀都搞唔掂嘅問題，我唔明香港啲統派，點解可以拍心口話搞掂。更加唔好講，曾志豪呢啲手指拗出唔拗入嘅港賊。仲要依家呢個政府，係唔會成日上北京，代表香港人幫中港收窄分歧。香港人唔係狗，但特區政府班高層就肯定係。

尹光一定係香港嘅icon，一個真係香港長大嘅人，唔識甘小文都好，都一定識尹光。

尹光睇落粗鄙，其實佢係一個時代嘅悲劇，屋企喺越南開戲院，自細學粵劇，甚至佢本身學師都係名師嚟。越南戰爭令佢變咗難民，但佢又無入到難民營尋求政治庇護（亦未必知），佢以唱市井歌曲求存，但行行出狀元，唱到變成名人就係。晚年佢憑唱市井流行嘅知名度，去累積成資本令佢得以發揮佢喺粵劇嘅才華。

尹光正係香港城邦嘅性格反映，一大班投奔自由嘅人，艱苦喺個英國人維持和平，但乜都無嘅環境各師各法，造就咗今日成就。所謂獅子山精神，就係一班一無所有嘅人，英國人俾佢地自由發揮嘅空間，然後發光發熱。所以香港集齊越南、大馬、印尼、中國等地難民發展出嚟嘅城市。

所以以往抵壘政策收難民，移民無掩雞籠，大家無所謂，一方面無福利攞，另一方面，唔同地方嘅人信念一致，就係投奔自由。西方有西柏林，東方就有香港。

今日嘅中國人大舉來港之所以同本土嘅人反檯，因為佢地唔係嚟投奔自由，呢班新移民為唔同利益，想幫中共消滅香港自由。所以呢班友，同香港嘅立市精神完全相反，連香港立市基礎，例如法治、守規則等等都破壞，咁大家點可能歡迎咁嘅人。壹週刊果班聽中共指揮，坐車由中國嚟香港投票，收錢投票嘅友仔，正係呢類港賊。

所以我唔反對印傭菲傭居港權，只要佢地考語文試（英文或粵語），有謀生能力，承認香港基本價值同立市精神就得。正如廟街王子係華裔越南人，而菲律賓國父黎剎醫生（都係華裔嚟），亦曾經喺香港中環半山行醫一樣。至於果班中國人，我唔會完全封晒門，但可以做到嘅，一百個都唔夠一個囉。

所以我對尹光呢個獅子山下嘅真icon，由衷敬佩。

班中國人連香港女醫生都敢打，而香港對示威者好惡嘅警察，只係勸交了事果陣，依家香港係等爆發一場大衝突，基本上，香港已經係1964年7月新加坡巫華開片前嘅狀態。

而今年農曆年，可以無事發生，亦可能爆得更大，因為依家成個城市都係易燃物品，只差在有無一個導火線。特別依家香港有一種無人出頭嘅悲頭，由政府都政客都唔敢出聲，甚至好似黃毓民呢挺政客，浪費大家時間喺小學雞爭執度，呢種怨氣遲早爆鑊甘。

依家已經唔係爆唔爆嘅問題，係幾時爆同爆幾大嘅問題。

南洋馬來族一向唔係太睇重國家統一，馬來西亞本來有汶萊同新加坡，汶萊選擇唔加入馬來西亞聯邦，新加坡夾唔嚟被趕走。亦因為新馬分家，反而仲相安無事，令印尼蘇哈圖政權倒台之後，印尼民眾反而接受到大部分信天主教嘅東帝汶離開。喺尤多約諾將軍未上台之前，海內外印尼知識界一路傾緊，除咗將印尼變成聯邦國家外，另一個選擇，係將印尼按唔同宗教、語言拆件算數，相處唔嚟無謂勉強。

當年東姑拉曼驅逐新加坡，一方面唔想李光耀真係反攻馬來半島，以李光耀喺馬來半島英語教育精英嘅聲譽，包括佢一口流利嘅馬來文（呢個亦係好多華裔領袖無），行動黨一個黨都可以取國陣代之。另一方面，因為一個新加坡，搞到三大族互相開片，亦唔係有腦嘅人管得掂。東姑拉曼既係王族，又係劍橋出身，娶過華裔老婆，亦做過政務官，佢知道有啲膠嘢，係佢或佢嘅接班人幾叻都唔會搞得掂。

依家咁嘅形勢，隨時觸發類似1947年2月28日台北發生嘅事件，一旦出現中港一定係世仇，係注定分裂無得救，仲衰過西藏同東土耳其（或者突厥，新疆呢個名我覺得真係要考慮停用）。台灣之所以族群問題搞到咁難解，因為好多本省籍人嘅祖宗係死喺二二八，或者白色恐怖，呢啲殺父、殺祖之仇係無得解。呢啲仇恨亦令台灣以中華民國之名獨立變咗有好大心理障礙，如果蔡英文贏到總統，就有望台灣走「奧地利化」之路。馬英九留美期間，做得太多膠事，佢都係預備一旦中國民主化果陣，有需要返中國本土吧。

為免水火不容，香港如果好似當年新加坡咁離開，香港對中國政治嘅影響力會減少好多，一如新加坡一離開，行動黨再無可能喺大馬發揮影響力一樣。咁樣反而可以靈活相處得到，新馬領導人或有爭拗，但民間往來至少係正常。你話真係高度自治都得，例如香港變成一個次國家嘅東西，內政自己搞掂，護照防務中國繼續代理，呢啲可以傾出嚟。一如汶萊同英國，今日都仲有一定關係一樣。

當然，我睇中國人係無咁醒，似乎中港關係，實向最壞方向走，因為文明教養呢樣嘢，無番一二百年都唔會搞得掂。勉強無幸福，但中國人偏要將自己搞成第二個南斯拉夫或者蘇聯。

好多人認為拉開新馬分家關鍵序幕，係1964年7月21日嘅種族騷亂。但真係令人民行動黨立心反攻馬來半島，最終迫使新馬一定分家，係9月嘅騷亂：

新加坡文獻館：新加坡1964年種族騷亂真相

「9月2日晚上，一名华族史古打骑士在东海岸路被两名马来人以石头攻击；10分钟后，一名华人在巴耶利¤路从巴士下车时，突然遭到两名马来人的袭击；一个半小时后，一名57岁的马来小贩在芽笼士乃神秘被杀，有人声称“他是被一群华人所杀，目的是要激起马来人对华人的种族仇恨”。这个事件激怒了在附近的马来人，并在这个地区引起一些种族冲突事件。到了隔天早晨，共有九名华人在冲突中受伤，其中两名伤势严重。

当政府在9月5日暂时解除戒严后，芽笼士乃又出现种族骚乱，警方后来展开行动逮捕了一些涉嫌颠覆活动的分子。到了9月8日，马来西亚副首相敦拉萨来新加坡访问，他促请甘榜的马来同胞“不要理会印尼试图挑起种族情绪的行动”。隔天，整个局面几乎回复正常。在9月的种族暴动中，总共有1439人被捕，新加坡政府最终在9月11日全面取消戒严。」

雖然似係印尼做（因為印尼當時派兵入侵柔佛州，簡單嚟講，蘇加諾條友已經黐咗線），但實際上，人民行動黨心知肚明，如果無大馬巫統班友縱容，係唔會俾呢類無厘頭襲擊發生，當時同印共合作無間嘅印尼，入侵柔佛州仲得到唔少大馬華裔協助，蘇加諾未膠到拎起石頭打自己隻腳嘅程度。只不過七月騷亂係明做，九月就暗做兼順便嫁禍俾印尼。人民行動黨因此決定反擊，喺全馬推廣馬來西亞人馬來西亞理念，之後東姑拉曼認為新加坡留喺度，簡直養虎為患，又唔敢引用ISA或者緊急法令將新加坡州政府嘅友仔全部拉清光，結果決定驅逐新加坡，睇李光耀點hihi（佢點知李光耀爆seed爆成咁啫）。

新報：adidas店排隊釀爭執

「現場為漢口道17號新聲大廈地舖，為運動服品牌adidas租賃地舖至3樓，闢作旗艦店。昨下午4時許，一名姓黃，身穿adidas「三間」設計款式淺色長袖運動外套、深色「三間」運動鞋的男子（23歲），與姓陳女友人（40歲）同到該店選購衣物，在2樓選得心頭好後，拿貨物欲往近樓梯的收銀處排隊付款。期間，不知為何與一名帶年幼男童、操內地口音的男子發生爭執，店員一度介入調停，但躁漢帶男童悻悻然離去。豈料約15分鐘後，躁漢手持利刀隻身折返尋仇，滿腔怒氣衝上旗艦店2樓，不由分說揮刀斬向黃的右邊後腦，躁漢欲再施襲，陳女制止時右手被斬傷，男店員姓黎（25歲）挺身阻止時左手無名指亦被割傷，現場遺下血斑斑。其他店員見發生血案，即時報警，兇徒可能亦被自己的暴行嚇怕，呆若木雞站在一旁。警方到場即將姓吳疑兇（39歲）拘捕帶署調查。救護員到場為3名傷者進行包紮後，送往伊利沙伯醫院診治，現場漢口道則圍滿看熱鬧的巿民，旗艦店事後拉閘暫停營業。」

呢次斬人，令我諗起1965年9月嘅新加坡。

未必係中共指令斬人，如果係中共製造斬人事件，立心製造種族騷亂（華語民族 v. 粵語民族），可以再誇啲。但呢次夠膽打尖斬人，唔只有人無公德心咁簡單，啲五毛喺內地孕婦論壇上，不斷貶低香港，仇恨香港嘅言論，應記一功。呢班友嘅無恥程度，同當年嘅《馬來前鋒報》絕對有得揮。

中國人入侵香港，再加上中國喺廣東省推普廢粵，同埋陸豐騷亂，香港人危機意識一啟動，唔係個個都係黃世澤呢挺港獨派，或陳雲呢挺自治主義者。如果有大棚人話要成為中國喺粵語文化捍衛者等等，一如當年馬來西亞人民行動黨嘅地位。中共會否怕兩廣獨立成燎原之勢，加上自已都管唔掂，甚至應付高幹嘅著草需要，要求香港離開，但由得香港自生自滅？

我唔信中國人有東姑拉曼嘅政治智慧，但依家嘅香港，絕對可以用牙煙過牙煙形容。如果中國人同香港人爆發大型騷亂，《中英聯合聲明》真係唔認default都唔得，屆時膠事一觸即發。當年馬新之爭，英國駐當地最高專員都有多少週旋調停，但大家最後都知係得個吉。

好多香港人以為，印尼籍人士喺香港做嘢，只得印傭。證明啲偽中產，對南洋了解嘅膚淺，依家呢篇文，佢地應該知踢中鐵板。

以前做scmp.com果陣，已經有一大班南洋人喺度。而喺金鐘嘅力寶中心，力寶呢兩個字，就係印尼一個數一數二大財團嘅名，今時今日力寶仲係力寶大廈嘅業主。當香港唔少社會中上層，或中層嘅人都同印尼有密切關連果陣，你葉劉係咪倒緊香港人米？

喺對幽靈選民，香港政黨係無經驗，就算有選民登記冊，都未必知出緊乜古惑。但喺南洋，特別係馬來西亞，呢類捉賊動作，幾乎係日日做。

呢幾年大馬巫統出茅招嘅水平去到令人髮指嘅地步，可以狼到無馬來西亞國籍嘅永久居民都照列入選民登記冊，為求勝選乜招都出。所以無論回教黨、民主行動黨定公正黨，都有律師、電腦專家等組成嘅隊伍，專責喺選民登記冊內捉鬼，而呢類捉幽靈選民嘅新聞，係經常喺當今大馬見到。

所以泛民如果唔想死咗都唔知乜事，最好依家諗一套適合香港嘅捉鬼方案，否則祝你好運。

後話：查實民協任國棟成功捉過一鋪賊

黃世澤：中國安老集團係唔係應該向公眾解釋吓？

呢啲捉賊功夫，真係要做架，否則你點擋住對家嘅賤招？

南洋人一向都對硬膠好接受，你見新加坡成街都賣緊明寸新加坡政府嘅Singapore is a fine city T恤，以至楊雅鎂居然用自己嘅膠嚟sell人民協會活動，就知大家幾咁熱愛膠。

而南洋人嘅膠力，同日常生活語言有關，我故意放Mr. Brown Show無字幕版嘅SIMI，就明白南洋人語言同生活中，點解接受到膠：

1. 語言大拼湊呢挺壞習慣，相信喺可見將來都消滅唔到。新加坡、馬來西亞甚至印尼，啲人都有本事喺一句說話裡面，同時存在幾種語言嘅詞語，呢種語言習慣本來就充滿膠味。如果話香港人中英夾雜頂唔住，我平日可以聽到同時有粵、英、華、印四國語言同時存在嘅句子，果啲乜嘢嚟？fly me aeroplane果啲，高登係當膠嘢嚟講嘅直譯英文，南洋人係夠膽係咁嗡出嚟。

2. 有啲老一代華人嘅生活習慣，係留存喺現代社會就會好膠，例如SIMI對女機主嘅感情事務諸事八卦，呢個係好多南洋上一代華人嘅作風嚟。所以啲人認為李光耀搞出個社交發展署出嚟，就代表佢獨裁，錯喇，呢個係老華僑style嚟，唔關李光耀一條友事，南洋有啲好西化嘅人，但有啲真係化石級嘅華人習慣，亦都同時存在。

所以依家互聯網世代真好，如果我日後有機會教東南亞政治，會慳好多功夫。南洋嘅膠力，在於佢同時喺n種文化嘅夾縫之間，華、歐（包括英、法、荷）、印、回教、馬來咁多種文化同時存在，就會係咁。

我講南洋就講得多，呢次梁文道係用香港人角度，由歷史闡述番南洋人到底乜回事。睇完呢篇嘢，大概會明白小弟嘅政治觀，以至陳雲講嘅香港自治運動源流喺邊度。

南洋人係一個縱橫四海嘅族群，甚至直到今日，仲有好多南洋人係隨時話返就返新加坡，甚至印尼，甚至喺成個南中國海周圍走，我嘅報紙文章同時見諸台灣、香港同新加坡，就係一個典型南洋人嘅寫照。

亦因為南洋人好早就同西方交往，甚至各族混居通婚係家常便飯(連我本人都唔係百分百漢族血統)，所以，南洋人嘅政治觀可以好革新，今日嘅泰國仲係姓鄭嘅王朝，喺澄海仲有泰國國王嘅衣冠塚，泰國政壇各派惡鬥大部分都係華裔鬥華裔，係得發動政變推翻他信嘅頒提係馬來半島回教血統(但佢極忠於王室)，喺婆羅州就搞咗個蘭芳共和國行共和政治加商業混合模式，由於新加坡住好多華人都係蘭芳共和國後人，所以新加坡始終唔放棄民主政治(你睇官委議員同非選區議員無晒啲關鍵權力，就知新加坡嘅國家設計嘅邏輯)，亦有人話新加坡係當代蘭芳共和國就係咁解。

喺新加坡共和國建立之後，其實南洋甚至唔可以講係信奉海洋中國一套，而係遠大，更包含唔同民族嘅海洋亞洲，甚至呢個呼應勝海舟、孫中山都提及過嘅亞洲主義。當然呢個亞洲主義3.0，中心思想係唔同亞洲國家，基於民主、自由等原則下達致整合。所以台獨、港獨有乜問題？最終整合喺一個類似歐盟嘅亞洲聯盟，呢個正係亞洲長治久安嘅根本。

所以我講辛亥百周年，不只去南方，而是向大海走。遠眺太平洋，至係更廣闊嘅天地。所以我天生唔信得中國，香港至可以生存，因為海洋亞洲，有自已的生存能力同邏輯。

因為環線對住啲鬆軟土質，check唔清楚，搞出兩單膠嘢，膠到真係令人感到哀傷，對香港高鐵工程，絕對引以為誡。

尼誥大道倒塌事件聯合早報報導
新加坡國家圖書館對尼誥大道事件嘅參考資料

本來環線2006年通車，但點解搞到大超支，兼拖到2011年至全線通車，伸延線要等到2012，因為呢條海濱路線，喺處理啲土地鬆軟地段，犯小小錯就大鑊到無人信。尼誥大道倒塌事件係其中一劑，不單搞到主幹公路之一尼誥大道成年唔駛通車，塞到hihi。意外期間，煤氣、高壓電等管道中斷，後果可以好大劑，好彩尼誥大道事件事發位置唔係正中民居，因為尼誥大道都係條六線行車公路，加上南洋人走難反應一等快，否則後果可以極嚴重。但仍然搞到四死三傷，令人感嘆。

之後環線巴利峇耶至芽籠之間，有座叫福記大廈嘅舊樓，本來唔喺徵地範圍，但2005年8月突然收番，因為福記大廈嘅土質唔對話，點救都救唔番，侷住要成座收番。亦可以咁講，因為有尼誥大道慘劇在先，政府有所警惕，否則等到福記冧咗就至收，真係死得人多。

但如果尼誥大道事件發生喺富榮花園所在海泓道，令到出現路陷，甚至樓宇即時倒塌，又或者大火災（商戶點走？海泓道咁窄），或者大角咀、深旺道一帶有更多大廈，變咗福記翻版，咁大超支條數邊個孭起？新加坡由2006年起好拖到2011年底至通到車，咁香港？

呢次返新加坡後，我對中國高鐵香港段持高度保留意見，唔該儘早暫停工程。區議會選舉期間，富榮嘅居民，睇清楚當年尼誥大道事件幾得人驚，再質品鍾港武條hihi，究竟佢諗住點算？