Category Archives: 中國政治

喺香港，面對成堆以為幫老共就會發膠達嘅hihi，認真唔得閒。但依家，香港人真係應該要醒。 1. 陸豐烏坎單嘢，係應該比我估計大鑊n倍，因為打到中共官員撤退當地，簡單嚟講，中共官員撤守當地，居民以武力有效控制當地，並實施自治，就算遭到包圍，都可以視入己解放論，廣州太石村事件都無勁抽。當第一鑊有中共軍警政府人士全部被打出村果陣，之後類似事件陸續有嚟，即係隨時可能出現辛亥革命嘅情況。辛亥革命大家要記住，都係新軍幾條驚被人拉搏一鋪嘅革命黨，求其打響第一槍咁樣就武漢三鎮失守。 2. 單係烏坎死守都未必引發中共倒台，但如果隔離有同樣徵地糾紛嘅龍頭村都揭竿而起，陸豐市內不斷出現「解放地區」嘅話，情況就會好差，一係陸豐官員最後打到著草，一係變成中國版光州。 3. 但中國版光州佢未必玩得起，除咗令國際嘩然，引起西方各國搵機會郁中國之外，仲有浙江永康12月15日已經大學生示威 如果派大量兵力鎮壓廣東，但搞到中國東南浙江等地防務空虛，溫州成街走數事件，就係四川保路風潮翻版。都仲未計軍轉幹部啲數，唔找嘅話會唔會有基層軍人攞槍出嚟玩嘢，呢個年代，乜都可能發生。 所以，我對各位嘅忠告： a. 有加拿大、澳洲、紐西蘭、美國、葡萄牙等地護照，唔好再用特膠護照，係時候幫你本人同仔女換番你原本屬於國家嘅護照 b. 最好喺海外有銀行戶口，否則你走難果陣無人可憐你 c. 如果你有BN(O)，帶BN(O)出去外遊或公幹，一旦你不幸「無家可歸」（即係中國大亂，香港仲亂過中東），仲可以根據BNA 1981 Section 4B成為英國公民，過期嘅BN(O)都帶定，無人知呢個政權幾時game over d. 有細路嘅，應該提早做好走佬安排，啲師奶追少陣膠劇唔會死，一路追膠劇而唔顧大局，到時累全家 e. 立心留喺度嘅，你依家諗清楚要點帶領香港，但唔好妄想領導中國民主化，中國呢個國家無得救。 f. 女友係空姐嘅，或有至親做航空公司，可以問定最易買長期有效走佬機票點買

因為自小弟2010年嘅休blog日起，小弟已經唔多想發暴亂警告，所以我好遲至講烏坎事件。但依家陸豐嘅形勢，我認為已經係一個重要嘅turning point，香港人必須注意。 呢次烏坎咁虐待村代表，同埋用到圍城斷水斷電呢啲仆街招，簡單嚟講，佢地係用1948年長春圍城戰呢啲hihi手段對付村民，根本係人道危機嚟，當年國際社會唔理長春圍城戰，幾多人被餓死。所以香港人一定要留意呢件事，特別中共呢班人渣，係夠膽喺香港採取同樣手段。 而鳥坎人並無似當年國軍同民眾咁坐以待斃，因為中共意圖攻入去，但烏坎人武力還擊。而與此同時，陸豐係同時發生教師維權事件，越嚟越有跡象，中國嘅維權抗爭由點變線，再變成面，咁樣玩落去，係好有機會釀成巨變。 由烏坎嘅教訓，可以話俾香港人聽係，中共唔一定用駐港解放軍真係殺平民，佢地用圍城手段都可以，一如大石英司寫嘅《香港獨立戰爭》呢本小說嘅橋段。而香港人可能要開始學習使用Ka Band衛星嘅通訊手段，自行儲糧，同埋果班喺原居民港奸手上嘅土地，有必要時要徵用作糧食儲備，或者自己屋企有細路仔嘅，應該考慮留唔留喺香港嘅問題，長春圍城戰嘅結果係好令人不寒而慄。而香港人亦要準備好同海外各國政府聯繫，有必要果陣係要請求外國介入。 中國共產黨就係一個人渣政權，讀歷史會令大家知多啲呢班友，你話《天與地》人食人得人驚，你梗係未知乜叫地獄。 後話：大石英司《香港獨立戰爭》嘅劇情簡介：「香港獨立戰爭」是指香港想獨立，因此中共軍隊對香港軍事封鎖長期化，因為二百萬市民失去了食糧、水及電氣，日本決定以人道立場來救援，但是祇派出一艘運輸艦及其上搭載的一艘反潛機來護衛滿載援助物資的二十幾艘民間的貨物船團。但是中共指此為侵犯中國主權，而宣布將以最新銳的基洛型潛水艇來加以攻擊，日本船團在外交上陷於微妙的立場，而中共的潛水艇則等在巴士海峽。 一旦三百幾萬BN(O)、BC同各國公民嘅香港被中共咁玩法，大家諗到係乜嘢戰略災難會發生。

何柱國記者全都錄 何柱國講嘢梗係好好笑，果種寸嘴真係唔係個個學到。但何柱國打梁振英打到咁狠，食完花生要知死字點寫。 何柱國之所以殺得咁手起刀落，因為北京十八大各派嘅權鬥已經進入白熱化階段，我一早講過，梁唐之爭唔係中共嘅「人民內部矛盾」，係「敵我矛盾」，當係「敵我矛盾」果陣，係任何可以用嘅手段都會用。梁振英可以用唐英年嘅情史嚟打唐英年，唐英年陣營嘅人一樣可以煲大梁振英DTZ一鋪清袋嚟顯得梁振英無能。 雙方都咁打嘅時候，北京查實隨時搞到打內戰都得，大家應該要清楚一樣嘢，十八大唔會有共識，香港呢場代理人戰爭都打到咁，北京如果進一步傾唔掂數，係乜事都可以發生。所以我對搞HKAM又好，要求英國重返香港都好，我都唔會反對，任何可以保護到香港人嘅方法，除咗賣屎忽俾老共，都會係好方法。 大家以為呢包花生好好食，我睇完笑完之後係陣陣寒風。

當土共以為自己種票大勝之際，土共嘅後盾，亦即中國開始面臨問題，依家發展趨勢令人不安。 加拿大星島日報：四人住家遭警方封鎖 家屬全被帶走吉林「兵變」 傳涉家鄉強拆 「吉林4名解放軍9日攜槍出走，其中3人幾小時後即被擊斃。雖然官方至今諱莫如深沒有發布任何消息，但有網友10日爆料稱，事因帶隊的中士班長楊帆家遭強拆，因此偷槍趕回家「報仇」。而其他3人則出於義氣同往助拳。消息稱4人住家目前均已被當地警方封鎖，家屬也已全部被帶走。」 中國茉莉花革命網：【首发】中山市东升镇益隆村土地争议 千计武警出动 (视频/图) 「2011年11月12日早上，中山市公安部派出上千武警到场镇压，见人就打，见车就砸扔到河里去，村民无奈只好作出反抗，动用汽油弹、煤气瓶还击，双方发生激烈冲突，造成至少一人死亡数十名村民受伤，二间工厂被烧掉，十多名警察被烧伤。」 兩件事都指向同一個答案，中國人為反抗拆遷等事，準備採用武力反抗。吉林四名解放軍下午兵變因為欠策劃，當然衰咗。但如果越多人捲入呢啲維權風暴，有可能終有一日會出現兵變，或民眾佔領政府嘅狀況，加上十八大大混戰，有可能結果係，喺全世界未準備好嘅情況，中國發出大型內亂，甚至內戰。 如果呢幾個月經濟出現大崩潰，突發情況就越容易發生，同越容易失控。下級軍官兵變自據為王唔出奇，唔通你要用核彈對付下級軍官咩。 總之情況，明顯係香港要準備中國向一條急流走，特別中大郎咸平教授話中國周圍都係希臘嘅演講，己經作出極清晰嘅警告。

見到織里嘅情況，我覺得香港人要認真思考一吓，出紅海嘅問題。 呢種大亂，只會越嚟越多，越嚟越激，因為地方政府無水問題，中央政府解決唔到。否則中共唔會冒地方政府可以搞軍閥割據之險，都要俾浙江、廣東、深圳、上海發債。呢四個地方有實力貪官最多，有必要果陣，中共默許地方武裝一啲都唔出奇，班友個個要保命，話之你hihi。 呢鋪玩到咁膠，因為唔知邊條地方官中嘅奇人，竟然加一倍衣車稅，啲車衣工人分分鐘被人走緊數，你仲加一倍稅，咁實同你死過喇。大家睇到溫州嘅情況，應該估到分分鐘成個浙江、上海一帶都係呢啲計時炸彈，要爆就爆，如果搞到各地聯動更加亂上亂，呢鋪有安徽佬私運槍枝過去織里，你諗吓。加上西藏近日已經發展到有藏人頂唔住，炸地方政府大樓，即係中共喺西面唔可能減兵力，東西包抄之勢己成，湖北、湖南如果都爆膠事，我都唔知有乜事發生。 香港人如果想走，請依家即度走人計劃，唔想走嘅，就諗一旦中共爆煲，可以點自保，大批中國難民南逃，或者爆發中國內戰，你估講玩。 香港本身己經係激流之勢，依家中國嘅大勢，真係唔慌唔激流中國。 後話：NHK 2007嘅紀錄片，用激流中國命名，以中文而論都準到極，當仲喺上游好多人都唔知死字點寫，依家睇嚟就嚟去到瀑布，日本仔一早睇到有幾大劑。如果依家你仲未知中國嘅大鑊來源，可以先睇NHK嘅激流中國系列，了解「中國政治激流水文圖」。

梁文道：辛亥百周年-去南方 我講南洋就講得多，呢次梁文道係用香港人角度，由歷史闡述番南洋人到底乜回事。睇完呢篇嘢，大概會明白小弟嘅政治觀，以至陳雲講嘅香港自治運動源流喺邊度。 南洋人係一個縱橫四海嘅族群，甚至直到今日，仲有好多南洋人係隨時話返就返新加坡，甚至印尼，甚至喺成個南中國海周圍走，我嘅報紙文章同時見諸台灣、香港同新加坡，就係一個典型南洋人嘅寫照。 亦因為南洋人好早就同西方交往，甚至各族混居通婚係家常便飯(連我本人都唔係百分百漢族血統)，所以，南洋人嘅政治觀可以好革新，今日嘅泰國仲係姓鄭嘅王朝，喺澄海仲有泰國國王嘅衣冠塚，泰國政壇各派惡鬥大部分都係華裔鬥華裔，係得發動政變推翻他信嘅頒提係馬來半島回教血統(但佢極忠於王室)，喺婆羅州就搞咗個蘭芳共和國行共和政治加商業混合模式，由於新加坡住好多華人都係蘭芳共和國後人，所以新加坡始終唔放棄民主政治(你睇官委議員同非選區議員無晒啲關鍵權力，就知新加坡嘅國家設計嘅邏輯)，亦有人話新加坡係當代蘭芳共和國就係咁解。 喺新加坡共和國建立之後，其實南洋甚至唔可以講係信奉海洋中國一套，而係遠大，更包含唔同民族嘅海洋亞洲，甚至呢個呼應勝海舟、孫中山都提及過嘅亞洲主義。當然呢個亞洲主義3.0，中心思想係唔同亞洲國家，基於民主、自由等原則下達致整合。所以台獨、港獨有乜問題？最終整合喺一個類似歐盟嘅亞洲聯盟，呢個正係亞洲長治久安嘅根本。 所以我講辛亥百周年，不只去南方，而是向大海走。遠眺太平洋，至係更廣闊嘅天地。所以我天生唔信得中國，香港至可以生存，因為海洋亞洲，有自已的生存能力同邏輯。

我今日睇啲讀左派理論讀到走火入魔，對果啲悼念Steve jobs嘅人，講到佢地同魔鬼一樣，我唔係盲目Mac友，但條氣唔順，我覺得有必要丙爆佢。 1. 富士康第n跳，當然係hihi，但hihi果個叫郭台銘，唔只蘋果一間公司會搵鴻海代工，HP都有，你又唔丙爆HP？ 2. 比起其他電腦公司，我相信蘋果嘅弱勢社群關懷，分分鐘比其他公司強，藏人一直都有無手機用，無法用自己文字發短信嘅問題，雖然中國移動同Motorola一齊出過藏語手機，但幾多人買得到呢啲手機（大家知中國政府對藏文嘅滅絕態度），但iPhone 4成為第一個支援藏文嘅一般手機。所以今日最多謝Steve Jobs，係西藏人，我想問，其他公司，唔計Google，做得到咩？Steve Jobs對西藏文化嘅關懷，我係估唔到。 3. 喺微軟霸權嘅年代，唔計Open source運動，邊個依然頂住，仲成功打番微軟轉頭？ 香港好多啲走火入魔嘅左膠，我欣賞香港大學師生監察無良僱主SACOM對富士康同蘋果嘅監察，因生產iPhone同iPad而死或傷嘅工人，佢地係應該得到賠償同平反，但有人如果話到Steve Jobs係希特拉果啲，我回應係：先生，你係時候食藥。呢啲己經係是非不分嘅極端左派，呢班友千祈唔好上台，否則隨時搞出波爾布特出嚟。波爾布特同希特拉，都係果個級數嘅垃圾。

真係，睇中國報紙，保證日日有膠聞。

當今中國真係越嚟越似晩清，連解放軍駐港部隊比較「精銳」部隊都屎成咁，唔好講其他。真係打仗，戰果真係唔駛問阿貴。 唔好講笑，可能全中國最好打，除咗中南海啲保安，可能係跟英國陸軍SAS訓練規格嘅香港警察飛虎隊。

當香港嘅土共準備預祝喺人民力量協助下，區議會選舉大勝之際，佢地未必諗頭，查實佢地果頭近。 究竟有幾近，有留意Credit Default Swap 市況，就知我講緊乜。 中國CDS水平，喺9月30日升到接近200點子嘅水位，曾經升過200，即係反映市場人士認為，中國走數風險勁過法蘭西，而且好肯定，會越來越多人賭中國走數。 而中國CDS水平唔係人為炒作嘅結果，因為溫州就嚟可以改名做陶國能之州，因為好多企業老闆因為資金鏈斷裂而走數，走數呢家嘢，係會火燒連環船，最終好可能係銀行系統找數，屆時中國經濟唔係硬著陸，而係仆咗街，國金二期天台跳落嚟果隻。一旦出現呢種情況，中共政權做乜決定都會果頭近。 所以HSBC呢間同時受英國同中國經濟影響嘅大行，股價會一路食瀉藥咁跌。而人民幣你以為佢會長期升值，如果中國經濟有可能會free fall，你認為北京會由得人民幣升落去？人民銀行暗中干預，隊人民幣匯水落嚟就有份。依家仲揸人民幣，隨時變成唐英年一樣嘅傻仔。 有睇開呢個博客嘅朋友，相信佢地個人投資無乜大損失，但係時候renew你本bn（o）或加拿大護照。無睇開嘅，自己醒醒定定做人。