Category Archives: 台灣政治

有啲台北人都唔明，點解會搞出ECFA主要受惠地區，越投越綠，甚至藍營嘅強區變咗綠營票倉，究竟搞邊科。 香港人就明發生緊乜事，香港CEPA受惠，係啲大地產商，小市民有受惠咩，受難就有。 就算有錢賺，你估香港人係雞，受你錢財要賣埋屎忽？我係台南賣魚嘅，同啲中國買魚友仔傾偈，果啲態度有幾惡頂，我諗香港人好清楚。返去投票，我仲唔投你民進黨。 台北人，或一啲香港中年人唔明係，有時，有錢唔係大晒。如果香港有人夠薑做香港民進黨，隨時殺個泛民、民建聯片甲不留，有啲嘢，大家忍咗好耐就係。

「黃 毓 民 稱 將 召 開 記 招 講 述 經 過 2012/01/15 19:21 被 指 在 台 灣 打 傷 民 主 黨 成 員 馮 煒 光 的 黃 毓 民 起 程 回 港 前 ， … Continue reading →

有時香港啲左膠之所以不得人心，因為有啲大家關心，佢地應該出聲嘅議題，可以完全唔見佢地嘅蹤影。 郭台銘係鴻海同富士康嘅大老闆，點理係左膠嘅重點聲討對象。但係郭台銘拒絕香港資本嘅壹傳媒，以及綠營嘅三立電視，以及自由時報記者採訪，又唔見啲左膠聲討？唔通上述三大傳媒，一個老闆係自由經濟右派，兩個係中國民族主義者嘅眼中釘，所以就唔駛出聲。郭台銘公然挑新聞自由機，仲唔係挑起全球對Foxconn公憤嘅好機會？點解班友又失蹤？ 所以我對啲左膠，越嚟越不解。

好多泛民嘅真心膠，都話馬英九幾清廉，手段幾乾淨，乜乜物物。跟住每次台灣大選，都話乜乜台灣民主勝利。 我呢次東渡作戰，我心情超唔同，先睇以下我1月13日晚喺京站門口，台北車站去其他縣市長途巴士總站門口收到嘅嘢先。 我想問以上係吉儀，定係賄選。乜可以咁當街派錢，點派錢，係如以下呢張相咁 擺明派俾回鄉投票嘅選民，馬英九清廉？我未計其他狗招，單係咁派錢，唔係紀念品，我覺得應該提出當選無效之訴，乜咁都得架？

小弟對Android本身無乜抗拒，亦可能考慮買部Android機玩吓，但係HTC嘅機，我死都唔買。因為HTC嘅老闆係王雪紅。 如果王雪紅唔買TVB，我都仲會買HTC產品，但自王雪紅買咗TVB後，TVB有幾多不知所謂嘢： 1. 新聞更加CCTV化 2. 全力配合中共封殺《天與地》，《天與地》被禁播，全無反抗 3. 唔理TVB勁歌金曲樂易玲亂嚟，連《CHOK》啲咁嘅垃圾都可以金獎 投共投到咁嘅商人，她1月13日挺馬話要支持九二共識有乜出奇，出賣得香港，唔爭在賣埋台灣。所以睇到CCTVB咁，仲力挺馬英九嘅香港人，我唔知佢地知唔知發生緊乜事。但我可以肯定，唔駛旨意我買HTC嘅機，我亦呼籲大家杯葛呢啲同中國蛇鼠一窩友仔出嘅手機。

呢段片好多人以為係民進黨產品，錯了，呢段片百分百Made in Hong Kong，當初林忌喺Facebook提咗個plot出嚟，然後交俾Michael Mo執行，咁有台語味道嘅華語對白，都係香港人嚟，我諗，大家都估唔到幾日內，整咗段咁民進黨味道嘅短片。 而呢段片嘅目的，係提醒台灣年青一代，唔好受中國欺騙，堅守台灣，投蔡英文，唔好再理馬英九條硬膠。 喺香港響1947年228重演邊緣果陣，由2003年起中國一連對港政策，事實證明係糖衣毒藥，呢段片就係篤爆呢啲糖衣毒藥，阻止台灣人再上當。台灣人，你要保護自己，不要理會中國嘅甜言蜜語。

好多大中華主義上腦嘅假左派，認定小弟呢挺港獨派，或陳雲呢挺自治派唔認識中國，或唔救中國。 呢啲讀壞書，燒壞腦嘅大中國主義分子，往往對中國有係幻想，並唔係真係認識中國。我諗有位台獨領袖嘅生平，會令大家明白，越認識當今中國，至會越反中國。呢位係台獨經典著作《台灣人四百年史》嘅作者史明。《台灣人四百年史》係今日了解台獨思想必讀著作，當然十個香港鬧台獨嘅友仔，九個無讀呢本書。 中共一向唔敢公開挑史明機，唔只因為史明真係好熟馬克思主義理論（真係熟馬克思主義會企喺獨派，抗拒中國殖民，所以我話香港好多假左仔），史明令中共最尷尬係，佢係一九三七年入中共控制下嘅日共，一九四二年去延安抗日，佢嘅資歷差唔多係中共元老級。如果話佢無參與救中國工作，唔好意思，江澤民、胡錦濤嘅中共黨齡全部唔係史明果皮。 佢之所以台獨，因為佢見過中共班友做嘢方式，亦睇過國民黨班友嘅做嘢方式，兩邊做嘢都係仆街嚟，同佢呢挺喺日本受教育嘅台灣人諗法唔同。史明可以講係日本精英，佢係早稻田大學政治經濟學系畢業。佢覺得中國人超唔妥，所以就完全對中國人死心，投向台獨運動。 陳雲投入中國民運可能比好多人深同廣，一九九三至九五年，佢係民主中國陣線德國分部主席，佢救過六百幾名當時喺德國嘅中國人。佢無欠中國，但佢同中國人打交道嘅經驗，亦會比好多人都深。所以佢變成自治派，我唔奇怪，史明走過咁嘅路，陳雲都會走咁嘅路，歷史係會重覆。 甚至李登輝提出建構新中原嘅理論，都係呢種海外華人蛻變站喺反中第一線嘅縮影，《武士道解題》係我一直要求任何研究台灣當代政治嘅人一定要睇嘅書，但《武士道解題》對好多人嚟講極難消化，因為大量引用四書五經，古文根柢少啲都係咁先。就算黃文雄寫嘅《哲人政治家，李登輝之「我」》，啲古文都係飛嚟飛去，無睇中國古籍習慣係消化唔嚟。李登輝嘅中華文化修養，比馬英九仲要好，但李登輝保留中國文化精粹，提出建立新中原嚟令台灣尋求自主，大家諗吓點解喇。好多獨派國學修養都唔差，特別日本返嚟果批，但你試吓叫果班國民黨二世祖引經據典，你睇吓邊個得。 香港假膠當道，有啲民族或國家無得救，真係無得救，亦無謂去救。香港做好自已獨立自主，就係對中華文化精要嘅最大救贖。係中國人欠我地（如果佢地仲珍視中華文化嘅話），我地完全無欠中國嘅。 後話：所以台獨無必要去中國化，因為依家呢個中國已經係垃圾，捍衛中華文化就係台獨正義之旗。如果再唔明，睇番德川光圀嘅歷史。《大日本史》係用古文寫，睇以下連結就明： 大日本史：卷之一百六　列傳第三十三

應曉薇只不過係一介台北市議員，只不過她已經成為台灣同香港有識之士圍剿對象。她竟然主張用凍水，喺天寒地凍嘅天氣射向瞓公園嘅流浪漢。呢種言論完全唔可以接受，所以我立即喺《自由時報》丙佢。 作為英國人，當然唔會接受呢挺言論。我國王位繼承人威廉王子，以王子之尊應慈善組織邀請，瞓咗一晚街。喺英國有市議員主張咁用凍水淋人，相信唔只《衛報》鏟到飛起，隨時係變咗David Starkey咁嘅級數蜜蜂竇兼即時落台，仲想出嚟撈，入BNP都救唔到佢。 而呢條友更大問題係，身為國民黨員，你信緊三民主義定納粹主義？ 三民主義包括民主、民權、民生，應議員，你將民權、民生放咗喺邊。如果孫中山仲在生，隨時立即叫你滾出國民黨喇。她依家嘅立場，納粹黨員就有佢份做。 呢個亦反映今日國民黨，已經係一個為利益乜都得嘅行屍走肉集團，應小姐咁亂嗡廿四，馬英九一句聲都無出，香港人仲對國民黨有無謂幻想嚟做乜？

梁文道：辛亥百周年-去南方 我講南洋就講得多，呢次梁文道係用香港人角度，由歷史闡述番南洋人到底乜回事。睇完呢篇嘢，大概會明白小弟嘅政治觀，以至陳雲講嘅香港自治運動源流喺邊度。 南洋人係一個縱橫四海嘅族群，甚至直到今日，仲有好多南洋人係隨時話返就返新加坡，甚至印尼，甚至喺成個南中國海周圍走，我嘅報紙文章同時見諸台灣、香港同新加坡，就係一個典型南洋人嘅寫照。 亦因為南洋人好早就同西方交往，甚至各族混居通婚係家常便飯(連我本人都唔係百分百漢族血統)，所以，南洋人嘅政治觀可以好革新，今日嘅泰國仲係姓鄭嘅王朝，喺澄海仲有泰國國王嘅衣冠塚，泰國政壇各派惡鬥大部分都係華裔鬥華裔，係得發動政變推翻他信嘅頒提係馬來半島回教血統(但佢極忠於王室)，喺婆羅州就搞咗個蘭芳共和國行共和政治加商業混合模式，由於新加坡住好多華人都係蘭芳共和國後人，所以新加坡始終唔放棄民主政治(你睇官委議員同非選區議員無晒啲關鍵權力，就知新加坡嘅國家設計嘅邏輯)，亦有人話新加坡係當代蘭芳共和國就係咁解。 喺新加坡共和國建立之後，其實南洋甚至唔可以講係信奉海洋中國一套，而係遠大，更包含唔同民族嘅海洋亞洲，甚至呢個呼應勝海舟、孫中山都提及過嘅亞洲主義。當然呢個亞洲主義3.0，中心思想係唔同亞洲國家，基於民主、自由等原則下達致整合。所以台獨、港獨有乜問題？最終整合喺一個類似歐盟嘅亞洲聯盟，呢個正係亞洲長治久安嘅根本。 所以我講辛亥百周年，不只去南方，而是向大海走。遠眺太平洋，至係更廣闊嘅天地。所以我天生唔信得中國，香港至可以生存，因為海洋亞洲，有自已的生存能力同邏輯。

這是對馬英九有性幻想的人寫的嗎？這口味都未免太重點了耶。 Short URL: http://wp.me/pvf9c-Zx